TANGGAP WACANA
PAHARGYAN KAMARDIKAN 17 AGUSTUS
Assalamualaikum W. W. Sugeng enjing.
Bapak Hadi Sutarmanto minangka Ketua
RW 11 Kampung Purbonegaran ingkang satuhu kinurmatan. Bapak Ibu Ketua RT saha
jajaranipun ingkang kula urmati. Bapak Ibu para warga ingkang minulyeng budi.
Kadang taruna mudha-mudhi sarta para rawuh ingkang satuhu bagya mulya.
Ingkang sepisan, sumangga kula dherekaken
monjukaken raos puji dalah sokur dhumateng ngarsanipun Gusti Allah Ingkang Maha
Agung, awit sih kanugrahanipun kita sedaya saged kempal wonten ing adicara
pahargyan pengetan Kamardikan Republik Indonesia.
Ingkang kaping kalih, kula
ngaturaken agunging panuwun dhateng para rawuh awit sampun kersa paring
pisumbang awujud menapa kemawon satemah adicara pahargyan pengetan dinten
kamardikan menika saged tumapak kanthi sae.
Bapak-bapak, Ibu-ibu, para sedherek
ingkang kula urmati. Adicara pengetan dinten kamardikan menika gadhah ancas
boten naming kangge suka parisuka ngawontenaken tetandhingan 17 Agustus
kemawon, ananging ugi saged kangge ngregengaken pasrawungan warga Purbonegaran
menika piyambak. Kampung Purbonegaran ugi ngawontenaken malam tirakatan ugi
syawalan nalika dalu 17 Agustus. Para warga sageda nyengkuyung pengetan menika.
Bok bilih anggen kula ngaturaken
tanggap wacana menika taksih kathah kekiranganipun, sarta menawi wonten basa
ingkang kirang duga kirang prayoga, mugi keparenga para rawuh paring
lumunturing sih samodra pangaksama.
Ing wasana cekap semanten. Matur
nuwun. Wassalamualaikum W. W.
